ធ្លាប់ឬអត់? នៅសុខៗមានអារម្មណ៍ថាអស់កម្លាំងដោយមិនដឹងមូលហេតុ!

ច្បាស់ណាស់ មានសកម្មភាពមួយចំនួនដូចជា ការធ្វើលំហាត់ប្រាណធ្ងន់ធ្ងរ ឬការបំពេញការងារខ្លាំងក្លា អាចធ្វើឱ្យថាមពលអ្នកក្នុងខ្លួនថយចុះ។ ស្របពេលនោះដែរប្រសិនបើអ្នកមិនបានធ្វើរឿងទាំងនោះហើយអស់កម្លាំង ក៏មិនមានអ្វីខុសប្រក្រតីដែរ ព្រោះថាមពលរបស់អ្នកក៏ជាប់ទាក់ទងដែរទៅនឹងទម្លាប់ប្រចាំថ្ងៃមួយចំនួន តោះមកដឹងទម្លាប់ទាំងអស់នោះ ទាំងអស់គ្នា៖

ខ្វះការគ្រប់គ្រងស្ត្រេស៖ ការមើលរំលងនូវភាពតានតឹងរបស់អ្នក អាចបង្កជាហានិភ័យកាន់តែខ្លាំង។ ហេតុនេះហើយការគ្រប់គ្រងភាពតានតឹង គឺសំខាន់ក្នុងការជួយរាងកាយឱ្យដំណើរការបានល្អ។ ការហាត់ប្រាណក៏ជាមធ្យោបាយមួយក្នុងការគ្រប់គ្រងភាពតានតឹងដែរ ព្រោះអាចបង្កើនកម្រិតអ័រម៉ូនអារម្មណ៍ល្អក្នុងរាងកាយក្នុងនោះរួមមានអ័រម៉ូន endorphins និងserotonin។
នៅជុំវិញអ្នកដែលទុទិដ្ឋិនិយម៖ មិត្តភក្តិ ឬអ្នករួមការងារ ដែលមានតែគំនិតទុទិដ្ឋិនិយមអាចជាដើមហេតុធ្វើឱ្យអ្នកអស់កម្លាំង ដែលប្រហែលជាអ្នកមិនបានចាប់អារម្មណ៍ ឬបានដឹងពីមុនមក។ ពួកគេអាចធ្វើឱ្យអ្នកធុញទ្រាន់់ បាក់ទឹកចិត្ត និងអស់សង្ឃឹមក្នុងជីវិត ដូច្នេះអ្នកគួររក្សាគម្លាតពីបុគ្គលប្រភេទនេះឱ្យបានច្រើន។
មិនបញ្ចប់កិច្ចការ ៖ មានកិច្ចការងារច្រើន ដូចដុំថ្មសង្កត់លើស្មាដែលអាចស្រូបយកថាមពលអ្នកជារៀងរាល់ថ្ងៃ។ អ្នកប្រហែលមានអារម្មណ៍គិតច្រើនស្រ្តេស ដែលជាហេតុផ្តោតការគិតបានត្រឹមត្រូវ នោះកម្លាំងថាមពលរាងកាយក៏ថយចុះទៅតាមនោះដែរ។ សម្រាប់ការងារអ្នកគួរតែជ្រើសយកការងារណាដែលមានសារសំខាន់ជាងគេ។
មិនញុំាអាហារមានថាមពល ៖ នេះអាចមកពីគ្នាយើងខ្លះញ៉ាំអាហារកែច្នៃ ឬអាហារមានជាតិស្ករច្រើនដើម្បីទប់ទល់នឹងភាពតានតឹង និងការបារម្ភផ្សេងៗ។ ប្រសិនជារបបអាហាររបស់យើងមានអាហារកែច្នៃច្រើន យើងអាចនឹងកត់សម្គាល់ថានឹងហត់អស់កម្លាំង។ របបអាហារមិនល្អអាចធ្វើឱ្យកម្រិតជាតិស្ករក្នុងឈាមមិនមានលំនឹង និងបង្កការរលាក។
មិនបង្គ្រប់ជាតិទឹកក្នុងខ្លួន ៖ ខ្វះជាតិទឹកធ្វើឱ្យរាងកាយរបស់អ្នកចុះខ្សោយ មនុស្សមួយចំនួនតែងតែយកភេសជ្ជៈប្រភេទកាហ្វេអ៊ីន ឬមានជាតិស្ករ មកបំពេញថាមពលរបស់ខ្លួន ដោយមើលរំលងនូវអត្ថប្រយោជន៍របស់ទឹក។ ការពិតភេសជ្ជៈអាចត្រឹមជួយបំពេញកម្លាំងថាមពលបានត្រឹមតែមួយរយៈពេលខ្លីតែប៉ុណ្ណោះ ប៉ុន្តែវាមិនបានធ្វើឱ្យរាងកាយស្ថិតស្ថេរនោះទេយកល្អគួរយកទម្លាប់ញុំាទឹកមួយកែវពេញពេលព្រឹក ហើយបន្តបន្ថែមសារជាតិទឹកឱ្យបានពេញមួយថ្ងៃ។
ចំណាយពេលលើគ្រឿងអេឡិចត្រូនិច ៖ ច្បាស់ណាស់បុគ្គលភាគច្រើនតែងតែយកពេលវេលាដែលនៅសល់់បន្ទាប់ពីការសិក្សាការងារដ៏នឿយហត់ជាពិសេសនាពេលល្ងាចតែម្តង ធ្វើអ្វីដើម្បីជាការកម្សាន្តដូចជាការមើលទូរទស្សន៍ ឬចំណាយពេលលើទូរស័ព្ទ ថេបប្លេក ជាដើម។ ប៉ុន្តែអ្នកប្រហែលជាមិនបានដឹងទេថាសកម្មភាពទាំងនោះរឹតតែធ្វើឱ្យអ្នកមានអារម្មណ៍ល្ហឹតល្ហៃទៅវិញ យកល្អគួរតែយកការគេងរយៈពេលខ្លី ឬធ្វើលំហាត់់ប្រាណបន្តិចបន្តួចសម្រាប់បង្កើនកម្លាំងរបស់អ្នកជាថ្មី។
មិនសូវហាត់ប្រាណ ៖ នៅពេលរាងកាយមិនសូវបានធ្វើសកម្មភាព រាងកាយយើងនឹងមិនដំណើរការបានត្រឹមត្រូវតាមការគួរដែរ។ ដូចនេះហើយការហាត់ប្រាណអាចធ្វើឱ្យកម្រិតថាមពលមានភាពខុសគ្នា ព្រោះការហាត់ប្រាណអាចរក្សាលំនឹងរបស់អ័រម៉ូន និងជួយកំណត់ដល់ការកំណត់ម៉ោងគេង និងក្រោកឡើងរបស់រាង្គកាយដែលជួយឱ្យយើងគេងបានស្ងប់។
ការផ្លាស់ប្ដូរសំខាន់ៗក្នុងជីវិត ៖ ការផ្លាស់ប្ដូរសំខាន់ៗក្នុងជីវិតដូចជាការចាប់ផ្ដើមការងារថ្មី ការមានកូន ឬការផ្លាស់ប្ដូរទីលំនៅជាដើមអាចមានការប្រែប្រួលម៉ោងនៃការចូលគេង និងក្រោកពីគេងរបស់យើងដែរ និងបង្កើនភាពតានតឹង ហើយបើបាត់បង់ទម្លាប់ទាំងនេះសុទ្ធតែមានចំណែកក្នុងការធ្វើឱ្យយើងមានអាការៈអស់កម្លាំង។ អាការៈអស់កម្លាំងនេះកើតមានលើមនុស្សគ្រប់វ័យ ប៉ុន្តែមនុស្សពេញវ័យងាយនឹងសម្គាល់ជាងមនុស្សចាស់ព្រោះថាមនុស្សពេញវ័យជាធម្មតាគឺមានសុខភាពល្អ និងមានថាមពលជាងមនុស្សវ័យចំណាស់។
អត្ថបទដោយ៖ KiloHEALTH